ليش يادهري

كلمات الشاعر عبدالخالق المحن
ليش يادهري
ليش يدهري .. شلك أعليه
مو خلص صبري .. أرحم شويه
بس أنادي بدمعتي .. وياهو ليسمع شكوتي
أرحم شويه
..
أتعلمت همي .. من صبر أمي .. وأنحنى ضلعي
أذكر الزهرة .. وأسچب العبرة .. ولا نشف دمعي
أحسب أمن الباب .. چم جرح وأمصاب .. وأندب وأنعي
ونتي بصدري .. شوف يدهري .. وأرحم الوضعي
أمن الضلع تبدي .. وللغاضرية
ولازلم عندي .. بغربه مسبية
وأنظر الروؤس أخوتي .. وياهو ليسمع شكوتي
أرحم شوية
...
هاك أخذ بلواي .. وعد يدهري أوياي .. بلكن أتعدها
وأحسب أجروحي .. الهدمت أصروحي .. وحرت بضمدها
صوب البسمار .. بضعة المختار .. وتنزف بعدها
وطبرة الكرار .. من بعدها أشصار .. خلى أشيسدها
وبالحسن بعدة .. شفت الرزية
أمن أنمرد چبدة .. أبسم المنية
والله قطع چبدتي .. وياهو ليسمع شكوتي
أرحم شوية
...
مستمر نوحي .. وساكن بروحي .. وأنظر لحالي
أمن الضلع لليوم .. والقلب مهضوم .. ومنشده بالي
منه أدير العين .. لنحر أخوية أحسين .. وچم نحر غالي
أنا چم نحر مقطوع .. يادهر مرفوع .. ابرمحة يبرالي
من بعد خدري .. أشدولبت بيه
أوقف بيسري .. عد بني ميه
أميسرة وعد شامتي .. وياهو ليسمع شكوتي
أرحم شوية
...
أبكربلة أويا الرأس .. جيت يعباس .. وذابلة أجفوني
وين أبو النوامس .. شعتذر للناس .. من ينشدوني
بالغاضرية .. أبحرم مبتلية .. أبغربة عفتوني
ورأحت مسبيه .. وشسده عليه .. وشاهدة أمتوني
وين خدري وين .. والقمر وينه
وين أخويه حسين .. أبحسرة ردينه
شلون أرد لديرتي .. وياهو اليسمع شكوتي
أرحم شوية