رضيع الطفوف

رضيع الطفوف

للشاعر المرحوم
الحاج كاظم السلامي الكربلائي
يعـبد الله يشـوفي اللي يجـدّيني
إبسهم الصابك إتصوّب إصبّي عيني
* * * * *
يبني إشـافت إمّـك وإشّفت منها
إو تجـفي إبساع من عدها وتدوهنها
بمـناغاك والبســمات فاتـنها
ومن عـگبك يسـلواني إشيسـليني
* * * * *
شلون أسـله وأنام اللـيل يالغالي
وأشـوفنّك شـبح يبتـسم إگـبالي
أفـز والگه المهد يا مهجتي خالي
بنـائي ألـجيك تشبكني وتناغيني
* * * * *
تشبگني وأشبگك وأرشف الخدين
وإتجلّب إبصدري يا عـزيز إحسين

إوتتـهنّه إبرضاعك يا نمير العين
يا صـيوان مجـدي الشمخ بسنيني
* * * * *
تـدري الوالده إشتتهـنّه بالمولود
من إتـشوفه إبكترها يلعب إوموجود

تنـسه التعب كـله والسهر مفگود
يبـني إربـاك ما حسـيت ما ذيني
* * * * *
وآنه ساهرت يبني ليلاي إهـواي
ومن خلگك يضيج ايذوب شحم إحشاي

أطلبك بالمخاطر وبرفـيف إجلاي
إبسـاعات الـولاده المـوت يلـفيني
* * * * *
يا زهـرة حـياة أمّـك إبـدنياها
ومـا غـيرك بـعد حاجـه إتمـنّاها

إبعينك من تصد لمّك إشمـحلاها
ولـو صـدّيت من كل ولم تبـريني
* * * * *
إحساب اللي حسبته ما طلع عالكيف
مگـلوبي طـلع مـثل المشاهد طيف

يبـني بيك ضيّعت المضن يا حيف
كـل ظـني بـدال إربـاي توفـيني
* * * * *
چنت احسب أيامك يولدي وارجاك
تـكبر والنـواظر تـنظر إلممـشاك

أنـاديك وإتناديني إويسرني إنداك
ها (يـمّه) إبـلطف شـوگك تناديني
* * * * *
ردت أتـدلل إبجالك يبعد الروح
إو من اتمثـلّك هـمّ البگلبي إيروح

بعد ما حسّبت يبني تجي مذبوح
مـفطوم إسـهم شوفـتك تعـميني
* * * * *
إشما أشوفك هموم العالگلب ينزال
يا شـمعة حـياتي وسـلوة الـدلال

يا نسمة وفه من روضـة الآمـال
يتـضاحـك وردها بيـنك إوبيـني
* * * * *
عميت إبيوم شفتك ترفس إبرجليك
أتكمكش گمت ما شـوف أصدّن ليك

حسبت إتحضر يومي إنت إوتهيل إيديك
تربــان اللحـد فـوگي وتواريني
* * * * *
ما ريـد العمـر عگبك يبـدر التام
إبسـمه عزي تعلّه وإنخـسف ما دام

إبّحر الدم سبح ما وصل عمره عام
إشـيكلي اليعـتني إبـفگده يعـزّيني
* * * * *
مـليت الصبر والصـبر ملّ منّي
إوسـوّيت النيـاحه والحـزن فـنّي

بعد ما يصحه كيفي إويبتسم سني
منيـتي إتمّـن عليّـه لو تــوافيني
* * * * *